Հարաւային Ֆրանսայի Աւինիոն քաղաքին մէջ մզկիթի մը առջեւ արձակուած կրակոցին պատճառով վիրաւորուած են 8 անձեր: Այս տեղեկութիւնը կը հաղորդէ «Ռոյթըրզ» լրատու գործակալութիւնը` աւելցնելով, որ հետաքննութեան քաջածանօթ աղբիւրին համաձայն, փոխադարձ հրացանաձգութիւնը կրնայ հաշիւներու մաքրում ըլլալ եւ ոչ թէ ահաբեկչական յարձակում:
Աղբիւրը կը նշէ, որ վիրաւորներէն երկուքը տեղափոխուած են հիւանդանոց: Ան աւելցուցած է նաեւ, որ մզկիթէն դուրս եկող հաւատացեալները կրակոցի թիրախ չեն եղած:
«Լա Փրովանս» շրջանային թերթը, վկայակոչելով դատական աղբիւր մը, կը հաղորդէ, որ ոստիկանութիւնը դէպքը չի նկատեր ահաբեկչութիւն: Ըստ տեղեկութեանց, կրակոցը տեղի ունեցած է երիտասարդներու միջեւ վիճաբանութեան պատճառով:
Ականատեսներու համաձայն, դիմակաւոր երկու զինեալներէն մէկը կրակած է երեկոյեան ժամը 10:30-ին: Ապա անոնք դէպքի վայրէն փախուստի դիմած են:
Կը հաղորդուի, որ վիրաւորները ստացած են թեթեւ վէրքեր:
All the contents on this site are copyrighted ©. |